وہ فاقہ کش کہ موت سے ڈرتا نہیں ذرا
روحِ محمدؐ اس کے بدن سے نکال دو

علامہ محمد اقبال  

نبی ﷺ نے فرمایا: ’’بنی اسرائیل کی قیادت انبیاء ؑ کیا کرتے تھے۔ جب کوئی نبی مر جاتا تو دوسرا نبی اس کا جانشین ہوتا، مگر میرے بعد کوئی نبی نہ ہوگا، بلکہ خلفاء ہوں گے‘‘۔ (صحیح بخاری، کتاب المناقب، باب ما ذکر عن بنی اسرایل)

نبی اکرم ﷺ نے فرمایا:

’’میری اور مجھ سے پہلے گزرے ہوئے انبیاء کی مثال ایسی ہے جیسے ایک شخص نے ایک عمارت بنائی اور خوب حسین و جمیل بنائی مگر ایک کونے میں ایک اینٹ کی جگہ چھوٹی ہوئی تھی۔ لوگ اس عمارت کے گرد پھرتے اور اس کی خوبی پر اظہار ِ حیرت کرتے تھے، مگر کہتے تھے کہ اس جگہ اینٹ کیوں نہ رکھی گئی؟ تو وہ اینٹ میں ہوں، اور میں خاتم النبیین ہوں (یعنی میرے آنے پر نبوت کی عمارت مکمل ہو چکی، اب کوئی جگہ باقی نہیں ہے جسے پر کرنے کے لیے کوئی آئے) (دیکھیے، صحیح بخاری، کتاب المناقب، باب خاتم النبیین) مسند ابو داؤد میں اس کے آخری الفاظ یہ ہیں: ’’ختم بی الانبیاء‘‘ میرے ذریعے انبیاء کا سلسلہ ختم کیا گیا۔

آپؐ نے فرمایا کہ: ’’ مجھے چھ باتوں میں انبیاء پر فضیلت دی گئی ہے، 

۱۔ مجھے جامع اور مختصر بات کہنے کی صلاحیت دی گئی

۲۔ مجھے رعب کے ذریعے نصرت دی گئی

۳۔ میرے لیے اموال ِ غنیمت حلال کیے گئے 

۴۔ میرے لیے زمین کو مسجد بھی بنایا گیا اور پاکیزگی حاصل کرنے کا ذریعہ بھی 

۵۔ مجھے تمام دنیا کے لیے رسول بنایا گیا

۶۔ اور میرے اوپر انبیاءؑ کا سلسلہ ختم کر دیا گیا۔ (مسلم، ترمذی، ابن ِ ماجہ)

رسول اللہ ﷺ نے فرمایا: 

’’رسالت اور نبوت کا سلسلہ ختم ہو گیا۔ میرے بعد اب نہ کوئی رسول ہے نہ نبی‘‘۔ (ترمذی، کتاب الرؤیا، باب ذہاب النبوۃ)

رسول اللہ ﷺ نے فرمایا: ’’میرے بعد کوئی نبوت نہیں ہے، صرف بشارت دینے والی باتیں ہیں‘‘۔ عرض کیا گیا، وہ بشارت دینے والی باتیں کیا ہیں یا رسول اللہ؟ فرمایا: ’’اچھا خواب، یا فرمایا، صالح خواب‘‘۔ (مسند احمد، مرویات ابو الطفیل، نسائی، ابو داؤد)

نبی ﷺ نے فرمایا:

’’میرے بعد اگر کوئی نبی ہوتا تو عمرؓ بن الخطاب ہوتے‘‘۔ (ترمذی، کتاب المناقب)

امت ِ مسلمہ میں آنے والے جھوٹوں سے بھی آپ ﷺ نے قبل از وقت خبر دار کر دیا:

ثوبان سے روایت ہے کہ رسول اللہﷺ نے فرمایا: ’’ میری امت میں تیس کذّاب ہوں گے، جن میں سے ہر ایک نبی ہونے کا دعویٰ کرے گا، حالانکہ میں خاتم النبیین ہوں، میرے بعد کوئی نبی نہیں‘‘۔ (ابو داؤد، کتاب الفتن)

آپ ﷺ نے فرمایا: 

’’میرے بعد کوئی نبی نہیں، اور میری امت کے بعد کوئی امت نہیں‘‘۔ (بہیقی، کتاب الرؤیا۔ طبرانی)

ان احادیث سے ثابت ہوتا ہے کہ آپؐ آخری نبی ہیں، آپؐ کے بعد کوئی نبی آنے والا نہیں ہے، نبوت کا سلسلہ آپؐ پر ختم ہو چکا ہے اور آپؐ کے بعد جو بھی رسول یا نبی ہونے کا دعویٰ کریں وہ دجال و کذاب ہیں۔ قرآن کے الفاظ ’’خاتم النبیین‘‘ خود اس معاملے میں حجت ہیں اور نص صریح ہیں، سوچنے کی بات ہے کہ قرآن اور سنت خود ایک لفظ کی تشریح کر رہے ہیں، تو کوئی دوسرا معنی قبول کرنا تو درکنار اس کی جانب توجہ بھی نہیں کی جا سکتی۔

نبی اکرم ﷺ کی حیات کے آخری عرصے میں مسیلمہ کذاب نے نبوت کا دعویٰ کیا، اور نبی اکرم ﷺ کے وصال کے فوراً بعد حضرت ابوبکر ؓ نے اس کے خلاف لشکر کشی کی، اور جن لوگوں نے اس کی نبوت تسلیم کی ان کے خلاف صحابہ اکرامؓ نے بالاتفاق جنگ کی۔یہ شخص (مسیلمہ کذّاب) رسول اللہ ﷺ کی نبوت کا منکر نہ تھا، بلکہ اس کا دعویٰ تھا کہ اسے حضور ؐ کے ساتھ شریک ِ نبوت بنایا گیا ہے، رسول اللہ ﷺ کو اس نے جو خط لکھا اس کے الفاظ یہ ہیں: 

’’مسیلمہ رسول اللہ کی جانب سے محمد رسول اللہ کی طرف، آپ پر سلام ہو۔ آپ کو معلوم ہو کہ میں آپ کے ساتھ نبوت کے کام میں شریک کیا گیا ہوں‘‘۔

مورخ طبری کے مطابق مسیلمہ کے ہاں جو اذان دی جاتی تھی اس میں ’’اشہد انّ محمدا رسول اللہ‘‘ کے الفاظ بھی تھے، اس صریح اقرارِ رسالت ِ محمدیؐ کے باوجود اسے کافر اور خارج از ملّت قرار دیا گیااور اس سے جنگ کی گئی۔ یہ اجماعِ صحابہ کی بہترین مثال ہے۔

دور ِ صحابہؓ سے لیکر آج تک ہر زمانے کے، اور پوری دنیائے اسلام کے ہر ملک کے علماء اس عقیدے پر متفق ہیں کہ محمد ﷺ کے بعد کوئی شخص نبی نہیں ہو سکتا، اور یہ کہ جو بھی آپؐ کے بعد اس منصب کا دعویٰ کرے، یا اس کو مانے، وہ کافر اور ملّت اسلامیہ سے خارج ہے  یہ معاملہ کس قدر اہمیت کا حامل ہے، اس کا اندازہ اس سے کیا جا سکتا ہے:

امام ابو حنیفہؒ کے زمانے میں ایک شخص نے نبوت کا جھوٹا دعویٰ کیا، اور کہا کہ’’ مجھے موقع دو کہ میں اپنی نبوت کی علامات پیش کروں‘‘، اس پر امام اعظم نے فرمایا کہ: ’’جو شخص اس سے نبوت کی علامت طلب کرے گا وہ بھی کافر ہو جائے گا، کیونکہ رسول اللہ ﷺ فرما چکے ہیں کہ: لا نبی بعدی‘‘۔ 

(مناقب الامام الاعظم ابی حنیفہ لابن احمد المکی، ج۱، ص۱۶۱، طبع حیدر آباد ۱۳۲۱ ھ)

تفسیر کشاف میں علامہ زمخشری لکھتے ہیں: 

’’اگر تم کہو کہ نبیؐ آخری نبی کیسے ہوئے جبکہ عیسیؑ آخری زمانے میں نازل ہوں گے؟ تو میں کہوں گا کہ آپؐ کا آخری نبی ہونا اس معنی میں ہے کہ آپؐ کے بعد کوئی شخص نبی نہ بنایا جائے گا اور عیسیؑ ان لوگوں میں سے ہیں جو آپ ؐ سے پہلے نبی بنائے جا چکے تھے، اور جب وہ نازل ہوں گے تو شریعت ِ محمدیہ کے پیرو اور آپؐ کے قبلے کی طرف نماز پڑھنے والے کی حیثیت سے نازل ہوں گے، گویا کہ وہ آپ ﷺ ہی کی امت کے ایک فرد ہیں‘‘۔

 (تفسیر کشاف، ج۲، ص۲۱۵)

امام بیضاویؒ بھی خاتم النبیین کی یہی تشریح کرتے ہیں: 

’’آپؐ انبیاء میں سے آخری ہیں، جس سے انبیاء ؑ کے سلسلے پر مہر لگ گئی ہے، اور عیسیؑ کا آپؐ کے بعد نازل ہونا اس ختم ِ نبوت میں قادح نہیں ہے، کیونکہ جب وہ نازل ہوں گے تو آپؐ ہی
کے دین پر ہوں گے‘‘۔ (انوار التنزیل، ج۴، ص۱۶۴)

دنیائے اسلام کا جائزہ لیں توہندوستان سے لیکر مراکش اور اندلس اور ترکی سے لیکر یمن تک ہر صدی میں ہر مسلمان ملک کے اکابر علماء فقہاء اور محدثین و مفسرین متفقہ طور پر ’’خاتم النبیین ‘‘ کے معنی آخری نبی ہی سمجھتے رہے ہیں، حضور ﷺ کے بعد نبوت کے دروازے کو ہمیشہ ہمیشہ کے لیے بند تسلیم کرنا ہر زمانے میں تمام مسلمانوں کا متفق علیہ عقیدہ رہا ہے، اور اس امر میں مسلمانوں کے درمیان کبھی کوئی اختلاف نہیں رہا ہے کہ جو شخص محمد ﷺ کے بعد رسول یا نبی ہونے کا دعویٰ کرے اور جو اس کے دعوے کو مانے وہ دائرہ اسلام سے خارج ہے۔(دیکھیے: تفہیم القرآن، ج۴، ص۱۵۱)

سوچنے کا مقام ہے کہ نبوت ایک بہت ہی نازک معاملہ ہے، جس میں ذرا سی کوتاہی کفر تک پہنچا دیتی ہے، اسی لیے اللہ تعالی نے اس معاملے کو نہ اپنی کتاب میں مبہم چھوڑا ہے نہ اپنے نبی کی احادیث میں۔ صحابہ اکرام رضوان اللہ علیہم اجمعین کا اجماع بھی امت کے سامنے ہے، اور اس کے بعد کی پوری تاریخ بھی، جب کہیں بھی کسی جھوٹے مدعی نبوت کو جڑ پکڑنے نہیں دیا گیا، کیونکہ یہ کفر اور ایمان کا معاملہ ہے۔

ختم ِ نبوت امت ِ مسلمہ کے لیے بہت بڑی رحمت ہے، اس کی موجودگی میں امت میں ایک عالمگیر وجود اور عالمی برادری بنی ہے۔اگر نبوت کا دروازہ حتمی طور پر بند نہ ہوتا تو امت کو یہ وحدت حاصل نہ ہو سکتی تھی۔

📌 میں کلمہ طیبہ لآالٰہ الّااللہ محمدرسول الله

 کا اقرار کرتے ہوئے  اپنے ایمان کی تجدید کرتی  ہوں کہ میں اللہ وحدہٗ لاشریک کو اپنا خالق و مالک اور معبودِ برحق سمجھتی ہوں…

📌 اس کی جانب سے نازل کردہ تمام انبیاء و رسل علیہم السلام اور ان پر نازل کردہ کتب کو برحق سمجھتی ہوں..

📌 میں اقرار کرتی ہوں کہ سیدالکونین، خاتم النبیین، ساقئ کوثر، شافع محشر، 

حضرت محمد صلی الله علیہ وسلم الله  کے آخری رسول ہیں، نبوت و رسالت کا سلسلہ حضرت محمد مصطفےٰ صلی اللہ علیہ وسلم پر ختم ہوچکا ہے.. 

📌 آپ کے بعد کسی بھی نبوت کے دعویدار، ظلی یا ذیلی نبوت کے مدعی کو کافر، زندیق، کذاب اور واجب القتل سمجھتی ہوں..

📌 میں ایمان رکھتی ہوں کہ آپؐ کے بعد کسی دوسرے نبوت کے دعویدار بالخصوص زندیقِ زماں مرزا غلام احمد قادیانی ملعون کو نبی ماننے والے مرزائیوں اور مرزائیوں کو مسلمان سمجھنے والے ہر شخص کو بلا جھجک کافر اور زندیق سمجھتی ہوں..

📌 میں ہر اس شاتم رسولﷺ کو آئینِ پاکستان اور حکم قرآن کی رو سے سزائے موت کا مطالبہ کرتی ہوں جس زندیق نے شان رسالتﷺ میں توہین کی ہو….

اشہد ان لآ الٰہ الّااللہ وحدہٗ لاشریک لہٗ و اشہد انّ محمداً عبدہٗ ورسولہٗ 

تاجِ و تختِ ختمِ نبوتؐ زندہ باد 

منکرینِ ختم نبوتؐ مردہ باد 

فداک ‌ابی ‌واُمّی یارسول‌اللہﷺ

قرآن مجید میں ذات باری تعالیٰ کے متعلق ”رب العالمین“ آنحضرت صلی اللہ علیہ وسلم کی ذات اقدس کے لئے ”رحمۃ للعالمین“ قرآن مجید کے لئے ”ذکر للعالمین“ اور بیت اللہ شریف کے لئے ”ھدی للعالمین“ فرمایا گیا ہے

عقیدہ ختم نبوت اسلام کا وہ بنیادی عقیدہ ہے جس میں معمولی سا شبہ بھی قابل برداشت نہیں‘ حضرت امام اعظم امام ابوحنیفہ کا قول ہے کہ:

”جو شخص کسی جھوٹے مدعی نبوت (نبوت کا دعویٰ کرنے والا) سے دلیل طلب کرے وہ بھی دائرہ اسلام سے خارج ہے“۔

کیونکہ دلیل طلب کرکے اس نے اجرائے نبوت (نبوت جاری ہے) کے امکان کا عقیدہ رکھا (اور یہی کفر ہے)

اسلام کی بنیاد :

اسلام کی بنیاد توحید ، رسالت اور آخرت کے علاوہ جس بنیادی عقیدہ پر ہے ‘ وہ ہے ”عقیدہ ختم نبوت“  حضرت محمد صلی اللہ علیہ وآلہ وسلم  پر نبوت اور رسالت کا سلسلہ ختم کر دیا گیا۔ آپ سلسلہ نبوت کی آخری کڑی ہیں۔ آپ کے بعد کسی شخص کو اس منصب پر فائز نہیں کیا جائے گا۔

ختم نبوت اسلام کی جان ہے :

یہ عقیدہ  اسلام کی جان ہے ‘ ساری شریعت اور سارے دین کا مدار اسی عقیدہ پر ہے‘ قرآن کریم کی یک سو سے زائد آیات اور آنحضرت کی سینکڑوں احادیث اس عقیدہ پر گواہ ہیں۔ اھل بیت ، تمام صحابہ کرام تابعین عظام، تبع تابعین، ائمہ مجتہدین اور چودہ صدیوں کے مفسرین ‘ محدثین ‘ متکلمین ‘ علماء اور صوفیاء (اللہ ان سب پر رحمت کرے) کا اس پر اجماع ہے۔ چنانچہ قرآن کریم میں ہے:

”ماکان محمد ابا احد من رجالکم ولکن رسول الله وخاتم النبیین“ ۔ (الاحزاب:۴۰)

ترجمہ:”حضرت محمد ا تمہارے مردوں میں سے کسی کے باپ نہیں‘ لیکن اللہ کے رسول اور نبیوں کو ختم کرنے والے آخری نبی ہیں“۔

تمام مفسرین کا اس پر اتفاق ہے کہ ”خاتم النبیین“ کے معنیٰ ہیں کہ: آپ  آخری نبی ہیں‘ آپ  کے بعد کسی کو ”منصب نبوت“ پر فائز نہیں کیا جائے گا۔ عقیدہ ختم نبوت جس طرح قرآن کریم کی نصوص قطعیہ سے ثابت ہے‘ اسی طرح حضور کی احادیث متواترہ سے بھی ثابت  ہے۔ چند احادیث ملاحظہ ہوں:

۱- میں خاتم النبیین ہوں‘ میرے بعد کسی قسم کا نبی نہیں۔ (ابوداؤد ج:۲‘ ص:۲۲۸)

۲- مجھے تمام مخلوق کی طرف مبعوث کیا گیا اور مجھ پر نبیوں کا سلسلہ ختم کردیا گیا۔ (مشکوٰة:۵۱۲)

۳- رسالت ونبوت ختم ہوچکی ہے پس میرے بعد نہ کوئی رسول ہے اور نہ نبی۔ (ترمذی‘ج:۲‘ص:۵۱)

۴- میں آخری نبی ہوں اور تم آخری امت ہو۔ (ابن ماجہ:۲۹۷)

۵- میرے بعد کوئی نبی نہیں اور تمہارے بعد کوئی امت نہیں۔ (مجمع الزوائد‘ج:۳ ص:۲۷۳)

ان  ارشادات نبوی میں اس امرکی تصریح فرمائی گئی ہے کہ آپ آخری نبی اور رسول ہیں‘ آپ کے بعد کسی کو اس عہدہ پر فائز نہیں کیا جائے گا‘ آپ سے پہلے جتنے انبیاء علیہم السلام تشریف لائے‘ ان میں سے ہر نبی نے اپنے بعد آنے  والے نبی کی بشارت دی اور گذشتہ انبیاء کی تصدیق کی۔ آپ نے گزشتہ انبیاء  کی تصدیق تو فرمائی مگر کسی نئے آنے والے نبی کی بشارت نہیں دی۔ بلکہ فرمایا:

۱- قیامت اس وقت تک قائم نہیں ہوگی جب تک کہ ۳۰ کے لگ بھک دجال اور کذاب پیدا نہ ہوں‘ جن میں سے ہرایک یہ دعویٰ کرے گا کہ وہ اللہ کا رسول ہے۔

０- قریب ہے کہ میری امت میں ۳۰ جھوٹے پیدا ہوں‘ ہرایک یہی کہے گا کہ میں نبی ہوں‘ حالانکہ میں خاتم النبیین ہوں‘ میرے بعد کوئی نبی نہیں۔ ان دو ارشادات میں حضرت محمد  صلی اللہ علیہ وآلہ وسلم  نے ایسے ”مدعیان نبوت“ (نبوت کا دعویٰ کرنے والے) کے لئے دجال اور کذاب کا لفظ استعمال فرمایا‘ جس کا معنیٰ ہے کہ: وہ لوگ شدید دھوکے باز اور بہت زیادہ جھوٹ بولنے والے ہوں گے‘ اپنے آپ کو مسلمان ظاہر کرکے مسلمانوں کو اپنے دامن فریب میں پھنسائیں گے‘ لہذا امت کو خبردار کردیا گیا کہ وہ ایسے عیار و مکار مدعیان نبوت اور ان کے ماننے والوں سے دور رہیں۔ آپ کی اس پیشنگوئی کے مطابق ۱۴۰۰ سو سالہ دورمیں بہت سے کذاب اور دجال مدعیان نبوت کھڑے ہوئے جن کا حشر تاریخ اسلام سے واقفیت رکھنے والے خوب جانتے ہیں۔ماضی قریب میں ”قادیانی دجال“ (مرزا غلام احمد قادیانی) نے بھی نبوت کا جھوٹا دعویٰ کیا تھا‘ خدا نے اس کو ذلیل کیا۔ اس لئے یہ ”ختم نبوت“ امت محمدیہ کے لئے اللہ تعالیٰ کی طرف سے عظیم رحمت اور نعمت ہے‘ اس کی پاسداری اور شکر پوری امت محمدیہ پر واجب ہے۔

قرآن کریم میں سورۃ النساء کی  تین آیات ( 11، 12 ،176) میں وراثت کے تفصیلی احکام بیان کیے گئے ہیں، جن کی مزید وضاحت صحیح احادیث میں کی گئی ہے۔ 

ان آیات کے مفہوم سے وراثت کی مکمل تفصیل معلوم ہو جاتی ہے۔

قریبی رشتہ داروں کی وفات کے بعد ان کے چھوڑے گئے، تھوڑے یا زیادہ مال میں، عورتوں اور مردوں کا حصہ ہے۔زمانہ جہالت میں عرب وراثت کے مال سے عورتوں کو حصہ نہیں دیتے تھے بلکہ ان کے نزدیک خود عورت کی حیثیت وراثت کے مال جیسی تھی۔ الله تعالی نے قرآن مجید میں نہ صرف وراثت میں عورت کا حصہ مقرر کیا بلکہ اسی کو پیمانہ بنایا۔ 

وراثت کی تقسیم  سے پہلے دو کام کرنے لازم قرار دئیے گئے ہیں۔

 ۱- اگر میت نے کوئی وصیت کی ہو تو پہلے اسے پورا کیا جائے۔

۲- اگر میت پر کوئی قرض ہو تو پہلے اسے ادا کیا جائے۔

مال کی تقسیم کے وقت اگر خاندان کے یتیم اور مسکین بھی موجود ہوں تو انہیں بھی اس مال میں سے دینا چاہیے۔ یہ سوچ کر ان سے نرمی کا معاملہ کرنا چاہیے کہ اگر وہ خود چھوٹے چھوٹے بچے چھوڑ کر مر گئے ہوتے تو ان کی اولاد کا کیا بنتا۔ وراثت کا مال تقسیم کرنے والوں کو خوفِ خدا کا احساس دلایا گیا ہے تاکہ یتیموں کے حق میں کوتاہی نہ کی جائے۔ یتیم کا مال کھانا اپنے پیٹ میں جہنم کی آگ بھرنے جیسا ہے۔

مالِ وراثت کی تقسیم کے سلسلے میں فرمایا کہ مرد کا حصہ دو عورتوں کے برابر ہے۔ اگر مرنے والا مرد ہے اور اس کی دو سے زائد لڑکیاں ہوں تو انہیں ترکے کا دو تہائی دیا جائے گا۔ اگر ایک ہی لڑکی وارث ہو تو آدھا ترکہ اس کا ہے۔ اگر میت کی اولاد میں لڑکے لڑکیاں دونوں ہوں تو اس کے والدین میں سے ہر ایک کو ترکے کا چھٹا حصہ ملنا چاہیے۔ اگر مرنے والے کی کوئی اولاد نہ ہو اور والدین ہی اس کے وارث ہوں تو ماں کو تیسرا حصہ دیا جائے گا اور اگر میت کے بھائی بہن بھی ہوں تو ماں چھٹے حصہ کی حق دار ہو گی۔ 

 اگر مرنے والی عورت ہو تو اس کے شوہر کو اس کے ترکہ سے  آدھا حصہ  ملے گا بشرطیکہ وہ بے اولاد ہوں۔ اولاد ہونے کی صورت میں ترکہ کا ایک چوتھائی حصہ شوہر کا ہے۔

 میت کی بیوی یا بیویاں ترکہ میں سے چوتھائی کی حقدار ہوں گی اگر وہ بے اولاد ہوں۔ صاحبِ اولاد ہونے کی صورت میں ان کا حصہ آٹھواں ہو گا۔ 

 اگر مرد یا عورت (جس کی میراث تقسیم طلب ہو) بے اولاد بھی ہو اور اس کے ماں باپ بھی زندہ نہ ہوں ، مگر اس کا بھائی یا ایک بہن موجود ہو تو بھائی اور بہن ہر ایک کو چھٹا حصہ ملے گا، اور بھائی بہن ایک سے زیادہ ہوں تو کل ترکہ کے ایک تہائی میں وہ سب شریک ہوں گے۔

ایسا بے اولاد شخص جس کے والدین بھی مر چکے ہوں اسے کلالہ کہتے ہیں۔ اگر ایسے شخص  کی ایک بہن ہو تو وہ اس کے ترکہ میں سے نصف پائے گی۔

 اگر بہن بے اولاد مرے تو بھائی اس کا وارث ہو گا۔ اگر میت کی وارث دو بہنیں ہوں تو وہ ترکے میں سے دو تہائی کی حقدار ہوں گی، اور اگر کئی بھائی بہنیں ہوں تو عورتوں کا ایک حصہ اور مردوں کا دوہرا حصہ ہو گا۔ اللہ تعالی نے وراثت کے تمام احکام کھول کر تفصیل سے بیان کر دئیے تاکہ لوگ بھٹکتے نہ پھریں۔ بے شک اللہ سبحانہ و تعالی ہر چیز کا علم رکھتا ہے۔

۔۔۔۔۔۔۔۔ 

اللہ تمہاری اولاد کے بارے میں تم کو ارشاد فرماتا ہے کہ ایک لڑکے کا حصہ دو لڑکیوں کے حصے کے برابر ہے۔ اور اگر اولاد میت صرف لڑکیاں ہی ہوں یعنی دو یا دو سے زیادہ تو کل ترکے میں ان کا دو تہائی ہے۔ اور اگر صرف ایک لڑکی ہو تو اس کا نصف ہے۔ اور میت کے ماں باپ کا یعنی دونوں میں سے ہر ایک کا ترکے میں چھٹا حصہ ہے۔ بشرطیکہ میت کے اولاد ہو اور اگر اولاد نہ ہو اور صرف ماں باپ ہی اس کے وارث ہوں تو ایک تہائی ماں کا حصہ ہے۔ اور اگر میت کے بھائی بھی ہوں تو ماں کا چھٹا حصہ ہو گا اور یہ تقسیم ترکہ میت کی وصیت کی تعمیل کے بعد جو اس نے کی ہو یا قرض کے ادا ہونے کے بعد جو اس کے ذمہ ہو عمل میں آئے گی تم کو معلوم نہیں کہ تمہارے باپ دادوں اور بیٹوں پوتوں میں سے فائدے کے لحاظ سے کون تم سے زیادہ قریب ہے یہ حصے اللہ کے مقرر کئے ہوئے ہیں اور اللہ سب کچھ جاننے والا ہے حکمت والا ہے۔

آیت:۱۱

یہ اللہ کی مقرر کی ہوئی حدیں ہیں۔ جو اللہ اور اس کے رسول کی اطاعت کرے گا اسے اللہ ایسے باغوں میں داخل کرے گا جن کے نیچے نہریں بہتی ہوں گی اور ان باغوں میں وہ ہمیشہ رہے گا اور یہی بڑی کامیابی ہے۔ (النساء-13) اور جو اللہ اور اس کے رسول کی نافرمانی کرے گا اور اس کی مقرر کی ہوئی حدوں سے تجاوز کر جائے گا اسے اللہ آگ میں ڈالے گا جس میں وہ ہمیشہ رہے گا اور اس کے لیے رسوا کن سزا ہے۔ النساء ۔ 14

۔۔۔۔

آیت کریمہ میں اللہ تعالیٰ فرماتا ہے، ”لڑکے کو دو لڑکیوں کے برابر حصہ دیا جائے گا“ یعنی ایک لڑکا لڑکی ایک ایک یا کئی کئی ملی جلی ہوں تو ان کے حصوں میں باہم یہ نسبت ہوگی کہ ہرلڑکے کو دوہرا اور ہرلڑکی کو اکہرا حصہ ملے گا۔ قرآن مجید نے لڑکیوں کو حصہ دلانے میں اس قدر اہتمام کیا ہے کہ لڑکیوں کے حصہ کو اصل قرار دے کر اس کے اعتبار سے لڑکوں کا حصہ بتلایا ہے، اور بجائے ”للأنثیین مثل حظ الذکر“ کے الفاظ سے فرمانے کے ”للذکر مثل حظ الأنثیین“ کے الفاظ سے تعبیر فرمایا ہے، جو لوگ بہنوں کو حصہ نہیں دیتے، اور وہ یہ سمجھ کر بادلِ ناخواستہ شرماشرمی معاف کردیتی ہیں کہ ملنے والا تو ہے ہی نہیں تو کیوں بھائیوں سے برائی لیں، ایسی معافی شرعاً معافی نہیں ہے، ان کا حق بھائیوں کے ذمہ واجب رہتا ہے، یہ میراث دبانے والے سخت گناہ گار ہیں، ان میں بعض بچیاں نابالغ بھی ہوتی ہیں ان کو حصہ نہ دینا دوہرا گناہ ہے، ایک گناہ وارث شرعی کے حصہ کو دبانے کا اور دوسرا یتیم کے مال کو کھانے کا۔ (معارف القرآن: ۱/۳۱۹ تا ۳۳۱، سورہٴ نساء: پ:۴) (۲)

یَسْتَفْتُوْنَکَ فِیْ النِّسَآءِ إلخ․ اس آیت کریمہ کا الگ سے کوئی شان نزول نہیں، بلکہ ضمناً خود اس آیت کریمہ سے ہی سمجھ میں آرہا ہے، وہ یہ ہے کہ صحابہٴ کرام نے آپ صلی اللہ علیہ وسلم سے وراثت کلالہ کے متعلق مسائل دریافت کیے تھے، تو اس وقت یہ مکمل آیت کریمہ نازل ہوئی۔ تفسیر: اس آیت کریمہ میں کلالہ کی میراث کا مسئلہ تفصیل سے بیان کیا گیا ہے، اللہ تعالیٰ فرماتا ہے کہ، لوگ آپ سے میراثِ کلالہ کے باب میں حکم دریافت کرتے ہیں، آپ جواب میں فرمادیجیے کہ اللہ تم کو کلالہ کے باب میں حکم دیتا ہے، وہ یہ ہے کہ اگر کوئی مرجائے، جس کی اولاد نہ ہو، یعنی نہ مذکر نہ موٴنث، اور نہ ماں باپ ہوں، اور اس کے ایک عینی یا علاتی بہن ہو، تو اس بہن کو اس کے تمام ترکہ کا نصف ملے گا، یعنی بعدِ حقوق متقدمہ، اور بقیہ نصف اگر کوئی عصبہ ہوا تو اس کو دیا جائے گا ورنہ پھر اسی پر رد ہوگا، اور وہ شخص اپنی بہن کا وارث کل ترکہ کا ہوگا، اگر وہ بہن مرجائے اوراس کے اولاد نہ ہو اوروالدین بھی نہ ہوں، اور اگر ایسی بہنیں دو یا زیادہ ہوں تو ان کو اس کے ترکہ میں سے دو تہائی ملیں گے، اورایک تہائی عصبہ کو، ورنہ بطورِ رد کے انھیں کو مل جائے، اور اگر ایسی میت کے جس کے اولاد نہ ہو، نہ والدین ہوں خواہ وہ میت مذکر ہو یا موٴنث، وارث چند یعنی ایک سے زیادہ ایسے ہی بھائی بہن ہوں، مرد اور عورت تو ترکہ اس طرح تقسیم ہوگا کہ ایک مرد کو دو عورتوں کے حصہ کے برابر، یعنی بھائی کو دوہرا، بہن کو ا کہرا، لیکن عینی بہن سے علاتی بھائی بہن سب ساقط ہوجاتے ہیں، اور عینی بہن سے کبھی وہ ساقط ہوجاتے ہیں کبھی حصہ گھٹ جاتا ہے، اللہ تعالیٰ تم سے دین کی باتیں اس لیے بیان کرتے ہیں کہ تم ناواقفی سے گمراہی میں نہ پڑو، یہ تو تذکیر واحسان ہے، اور اللہ تعالیٰ ہرچیز کو خوب جانتے ہیں، پس احکام کی مصلحتوں سے بھی مطلع ہیں، اور احکام میں ان کی رعایت کی جاتی ہے، یہ حکمت کا بیان ہے۔ (معارف القرآن: ۲/۶۲۶، ۶۲۷، سورہٴ نساء، پ:۶)

1. اصحابِ فرائض کے بعد عصبہ نسبی حصہ پاتے ہیں۔ یہ میت کے وہ ورثاء ہیں جن کو اصحابِ فرائض سے بچا ہوا تمام مال مل جاتا ہے اور اصحابِ فرائض نہ ہونے کی صورت میں تمام ترکہ ہی ان کو ملتا ہے۔ عصبہ کی دوقسمیں ہیں: عصبہ نسبی اور عصبہ سببی‘ عصبہ نسبی وہ ہیں جن کا میت سے ولادت کا تعلق ہو اور عصبہ سببی وہ ہیں جن کا میت سے عتاق (غلامی) کا تعلق ہو۔ لیکن آج کل عصبہ کی یہ دوسری قسم ختم ہو چکی ہے۔ عصبہ نسبی کی مزید تین اقسام ہیں:عصبہ بنفسہ، عصبہ بغیرہ اور عصبہ مع غیرہ۔

2. اصحابِ فرائض اور عصبہ نسبی نہ ہوں تو ترکہ عصبہ سببی کو ملتا ہے۔ عصبہ سببی، غلام کو آزاد کرنے والا ہے جو آج کل نہیں ہے۔
3. اگر کسی بھی قسم کے عصبہ نہ ہوں تو باقی مال دوبارہ نسبی اصحابِ فرائض میں تقسیم کر دیا جاتا ہے۔ اس عمل کو رد کہتے ہیں لیکن اس میں زوجین کو شامل نہیں کیا جاتا کیونکہ یہ سببی یعنی رشتہ زوجیت کے سبب وارث ہوتے ہیں۔
4. اگر اصحابِ فرائض اور عصبات میں سے کوئی وارث زندہ نہ ہو تو ذوی الارحام کو ترکہ ملتا ہے۔ یہ میت کے وہ رشتہ دار ہیں جن کا حصہ قرآن وحدیث میں مقرر نہیں ہے، نہ اجماع سے طے پایا ہے اور نہ وہ عصبات ہیں، جیسے پھوپھی، خالہ، ماموں، بھانجہ اور نواسہ وغیرہ۔
5. اگر ذوی الارحام بھی نہ ہوں تو مولی الموالات کو ترکہ ملتا ہے۔ فقہ کی اصطلاح ایک خاص قسم کے معاہدہ کو موالات کہتے ہیں۔ میراث میں یہ عقد احناف کے ہاں معتبر ہے جبکہ شوافع کے نزدیک معتبر نہیں ہے۔ اس کے مولی بننے کی کچھ شرائط ہیں لیکن یہاں تفصلات میں جانے کی ضرورت نہیں ہے۔
6. مذکورہ بالا ورثاء میں سے کوئی نہ ہو تو وہ شخص وارث ہو گا جس کے لیے میت نے اپنے غیر سے نسب کا اقرار کیا ہو یعنی کسی مجہول النسب کے بارے میں یہ کہا ہو کہ یہ میرا بھائی یا چچا ہے، اور اس کے اس اقرار سے اس کا نسب اس غیر سے ثابت نہ ہوا ہو، اور اقرار کرنے والے نے اپنے اقرار سے موت تک رجوع بھی نہ کیا ہو تو وہ مقرلہ بھائی یا چچا ہونے کی حثیت سے وارث ہو گا۔ اس کی بھی کچھ شرائط ہیں۔
7. اگر مذکورہ بالا ورثاء میں سے کوئی نہ ہو اور میت نے کسی کے لیے ایک تہائی سے زائد یا سارے ترکہ کی وصیت کی ہو تو تہائی سے زائد یا سارا ترکہ اسی کو دے دیا جائے گا۔
8. اگر مذکورہ بالا تمام لوگوں میں سے کوئی بھی نہ ہو تو میت کا ترکہ بیت المال میں جمع کروا دیا جائے گا۔

آخر میں ایک قابل توجہ بات بیان کرنا ضروری ہے کہ وراثت سے حصہ پانے کے لیے وارث اور مورث کا دین ایک ہونا ضروری ہے کیونکہ حضرت اسامہ بن زید رضی اللہ عنہ سے روایت ہے کہ نبی کریم صلی اللہ علیہ وآلہ وسلم نے فرمایا:

لاَ يَرِثُ المُسْلِمُ الكَافِرَ وَلاَ الكَافِرُ المُسْلِمَ.

مسلمان کسی کافر کا وارث نہیں ہوتا اور نہ ہی کافر کسی مسلمان کا وارث ہو سکتا ہے۔

بخاري، الصحيح، كتاب الفرائض، باب لا يرث المسلم الكافر ولا الكافر المسلم وإذا أسلم قبل أن يقسم الميراث فلا ميراث له، 6: 2484، رقم: 6383

مذکورہ بیان کردہ ترتیب سے ہی ورثاء میں حصے تقسیم کیے جائیں گے۔ یاد رہے کہ بعض اوقات کچھ ورثاء کی موجودگی میں کچھ دوسرے ورثاء محروم ہوجاتے ہیں، جیسے قریبی وارث کی موجودگی میں دور والا وارث محروم ہو جاتا ہے۔

لفظ "مذھب” اور لفظ "دین” میں مفہوم کے اعتبار سے بڑا فرق ہے، اکرچہ ہمارے ہاں عام طور پر اسلام کو مذھب کہا جاتا ہے، لیکن حقیقت یہ ہے کہ پورے قرآن مجید اور حدیث کے ذخیرہ میں اسلام کے لیے مذھب کا لفظ کہیں بھی استعمال نہیں ہوا، بلکہ اس کے لیے ہمیشہ "دین” ہی کا لفظ استعمال ہوا ہے۔ 

سورۃ آل عمران میں فرمایا گیا ہے کہ: ” اللہ کی بارگاہ میں مقبول دین تو صرف اسلام ہے”۔

دین اور مذھب میں بنیادی فرق کو سمجھ لیجے۔

مذھب کی جزوی حقیقت ہے۔ یہ صرف چند عقائد اور کچھ عبادت کےطور طریقوں کے مجموعے کا نام ہے جبکہ دین سے مراد ہے ایک مکمل نظام زندگی جو تمام پہلوؤں پر حاوی ہو۔ گویا مذھب کے مقابلے میں دین ایک بڑی اور جامع حقیقت ہے۔

اس پس منظر میں شاید یہ کہنا تو درست نہ ہوگا کہ اسلام مذھب نہیں ہے، اس لیے کہ مذھب کے جملہ بھی اسلام میں شامل ہیں، اس میں عقائد کا عنصر بھی ہے، ایمانیات بھی ہیں، پھر اس  میں عبادت یعنی نماز، روزہ ہے، حج اور زکواۃ ہے، چنانچہ صحیح یہ ہوگا کہ یوں کہا جائے کہ اسلام صرف ایک مذہب نہیں بلکہ مکمل دین ہے ۔ 

عام طور پر دین اور مذہب کو ایک دوسرے کے مترادف تصور کیا جاتا ہے، جبکہ ان دونوں میں بنیادی فرق ہے۔ 

دین کل ہے اور کسی بھی نظام کے اصول و ضوابط کا نام ہے۔ نیز دین، دنیا و آخرت کے تمام گوشوں کو محیط ہے اس کے برعکس مذہب جزو ہے جو شرعی عبادات احکامات سے متعلق رہنمائی فراہم کرتا ہے۔

تمام تعریفیں اللہ کے لیے ہیں جس نے کائنات کی تخلیق کی اور اپنے عظیم ترین نبی حضرت محمد صلی اللہ علیہ وسلم کو بہترین اخلاق سکھایا، ان کے اخلاق و کردار کو پاکیزہ بنایا اور انہیں اپنا دوست بنایا۔

ظہور پذیر حسن اخلاق خفیہ حسن سلوک کا نتیجہ ہے۔ جسم کے اعضاء کی حرکات خیالات کا نتیجہ ہیں اور ظاہری اعمال کردار اور طرز عمل کا نتیجہ ہیں۔ اللہ تعالیٰ کو پہچاننے کی کوشش کرنا اور حیرت انگیز خفیہ طاقتوں کا حصول اعمال کا نتیجہ ہے۔ اس خفیہ طاقت کی روشنی کا اظہار حسن کی شاعری کے طور پر کیا جاتا ہے۔

روح اور اعمال کی خوبصورتی. میں سب سے زیادہ حصہ ہمارے نبی صلی اللہ علیہ وسلم کا ہے ۔ ان کی بے شمار خوبیوں میں عاجزی اور سادگی کو ایک اعلیٰ اور ممتاز مقام حاصل ہے۔ قائد کے طور پر اپنے رتبے کے باوجود، نبی کریم صلی اللہ علیہ وسلم نے کبھی ایسا برتاؤ نہیں کیا جیسے وہ دوسرے لوگوں سے بہت بڑے یا بہتر ہوں۔ آپ نے کبھی لوگوں کو چھوٹا، ناپسندیدہ یا شرمندہ محسوس نہیں کروایا۔ آپ نے اپنے پیروکاروں کو نرمی اور عاجزی سے رہنے کی تلقین کی۔ جب بھی ممکن ہوا آپ نے غلاموں کو آزاد کیا اور صدقہ دیا، خاص طور پر غریبوں اور یتیموں کو بغیر کسی اجر کے نوازا۔

نبی کریم صلی اللہ علیہ وسلم انتہائی معتدل مزاج تھے۔ کم کھاتے اور صرف سادہ کھانا کھاتے تھے۔ انہوں نے کبھی پیٹ بھرنے کو ترجیح نہیں دی۔ بعض اوقات، آخری دنوں تک، وہ کچے کھانے کے علاوہ کچھ نہیں کھاتے تھے۔وہ اپنی بھوک مٹانے کے لیے اپنے پیٹ پر پتھر باندھتے تھے اور اگر اس کے پاس کوئی اور خوراک نہ ہو تو دودھ کو کافی سمجھتے تھے۔

سادہ زندگی اور قناعت رسول اللہ صلی اللہ علیہ وسلم کی زندگی کی اہم تعلیمات تھیں:

’’ان کو دیکھو جو تم سے نچلے درجے پر کھڑے ہوں لیکن ان کی طرف مت دیکھو جو تم سے اونچے درجے پر کھڑے ہیں، کیونکہ اس سے فیض حاصل ہوتا ہے۔ تم اللہ کی قسم (تمہاری نظر میں) حقیر ہو۔”

(مسلم)

آپ فرش پر ایک بہت ہی سادہ گدے پر سوتے تھے اور گھر کے آرام یا سجاوٹ کے لیے کچھ بھی نہیں تھا۔ لوگ ان کی اہلیہ عائشہ رضی اللہ عنہا سے جو ان کے پہلے اور سب سے وفادار صحابی ابوبکر رضی اللہ عنہ کی بیٹی تھی پوچھتے تھے کہ وہ گھر میں کیسے رہتے تھے؟

’’ایک عام آدمی کی طرح،‘‘ وہ جواب دیتیں۔

آپ گھر میں جھاڑو لگاتے، اپنے کپڑے خود سلائی کرتے، اپنے جوتے خود ٹھیک کرتے، اونٹوں کو پانی پلاتے، بکریوں کا دودھ نکالتے، نوکروں کو ان کے کام میں مدد دیتے اور ان کے ساتھ کھانا کھاتے۔ اور خود جا کر بازار سے ضرورت کا سامان لے آتے۔”

آپ صلی الله علیہ وسلم کے پاس شاذ و نادر ہی کپڑے کے ایک سے زیادہ جوڑے ہوتے تھے۔ آپ ان کپڑوں کو خود دھو لیتے تھے۔ گھر سے پیار کرنے والے اور پر سکون انسان تھے ۔

’’جب تم کسی گھر میں داخل ہو تو اللہ تعالیٰ سے اس میں برکت مانگو۔‘‘ آپ صلی الله علیہ وسلم فرماتے ۔

ہمیشہ سلام میں پہل کرتے اور کہتے: السلام علیکم – جس کا مطلب ہے: "تم پر سلامتی ہو” – کیونکہ امن و سلامتی اس زمین پر سب سے حیرت انگیز چیز ہے۔

آپ صلی الله علیہ وسلم نے غلاموں اور آزادوں دونوں کی دعوت قبول کی۔ انہوں نے بیواؤں اور غریبوں کی دعوت پر لبیک کہا خواہ انہیں دودھ کا پیالہ پیش کیا گیا۔ آپ ولیمہ میں شرکت کی دعوتیں قبول کرتے تھے، جنازوں میں شرکت کرتے تھے، بیماروں کو دیکھنے کے لیے دور دراز جایا کرتے تھے اور خوشبو پسند کرتے تھے لیکن بدبو کے باوجود غریبوں اور مسکینوں کے ساتھ بیٹھتے ، ان کے ساتھ کھانا کھاتے تھے، عزت والوں کی تعظیم کرتے ، ان کو نیکی اور حسن سلوک کی تلقین کرتے تھے۔

رشتہ داروں کے ساتھ کبھی سختی نہیں کی اور جس نے جو بھی عذر پیش کیا اسے قبول کر لیا۔ بعض اوقات وہ بغیر کوئی جھوٹ بولے لطیف بات کہہ دیتے، مسکراتے تھے لیکن کبھی قہقہہ لگا کر ہنستے نہیں تھے۔ آپ نے معصوم کھیل کھیلے اور ایسے کھیل دیکھے جو شیطانی نہیں تھے۔

آپ صلی الله علیہ وسلم اپنی بیویوں کے ساتھ اس قدر خوش مزاج تھے کہ ان کے ساتھ دوڑ بھی لگا لیتے ۔ آپ اور آپ کے گھر والے اونٹوں اور بکریوں کا دودھ پیتے تھے آپ انہیں کھانے پینے اور لباس میں برابر کا حصہ دیتے تھے۔

نبی کریم صلی الله علیہ وسلم نے اپنا سارا وقت کارآمد طریقے سے استعمال کیا۔ وہ غریب سے ان کی غربت کی وجہ سے نفرت نہیں کرتے تھے اور نہ ہی بادشاہوں سے ان کی حکومت یا طاقت کی وجہ سے ڈرتے تھے۔ امیر ہو یا غریب ادنی ہو یا اعلی آپ صلی الله علیہ وسلم ، لوگوں کو اللہ تعالیٰ کی طرف بلاتے تھے۔ اللہ تعالی نے انہیں تمام خوبیوں اور اچھی انتظامی صلاحیتوں سے مزین کیا حالانکہ آپ پڑھے لکھے نہیں تھے اور آپ کا لڑکپن چرواہوں کے ساتھ گزرا۔ آپ بھیڑ بکریاں چراتے تھے۔ اللہ کے تمام انبیاء علیہم السلام کا یہی دستور تھا اور اسی نے آپ کو عاجزی، صبر، رحم اور سادگی کا درس دیا۔ وہ اپنے نوکر کو اپنے پیچھے کسی بھی سواری پر سوار ہونے دیتے تھے خواہ وہ گھوڑا ہو، اونٹ یا گدھا۔ کبھی آپ ننگے پاؤں چلتے تھے اور کبھی آپ کے سر پر پگڑی یا ٹوپی بھی نہیں ہوتی تھی۔ آپ فرماتے تھے کہ (غلام یا نوکر) آپ کے بھائی ہیں اور اللہ نے انہیں آپ کے حکم میں رکھا ہے۔ پس جس کے ہاتھ میں اللہ تعالیٰ نے اس کے بھائی کو رکھا ہو اسے چاہیے کہ جو کچھ وہ کھاتا ہے اسے کھلائے اور جو پہنتا ہے اسے پہنائے اور اس سے اس کی استطاعت سے زیادہ کام نہ لے۔ اور اگر وہ اس سے کوئی مشکل کام کرنے کو کہے تو اس میں اس کی مدد کرنی چاہیے۔

(البخاری)

آپ نے اپنے غلاموں کو کبھی نہیں کہا جیسا کہ آپ کے دیرینہ غلام انس رضی اللہ عنہ کو یاد ہے۔ اپنی وفات سے چند روز قبل آپ صلی الله علیہ وسلم مسجد میں اپنے ساتھیوں کے سامنے حاضر ہوئے اور کہا: اے لوگو! تم میں سے جس کی پیٹھ پر میں نے مارا، یہ ہے میری پیٹھ تو وہ مجھ سے بدلہ لے لے۔ تم میں سے جس کا بھی میں نے مال لیا، میں اسے واپس کرنے کے لیے حاضر ہوں۔

سامعین کو حیرت میں ڈال کر ایک آدمی کھڑا ہوا اور کہا: ’’ہاں آپ نے ایک بار میرے پیٹ پر چوٹ لگائی تھی‘‘۔ مسکراتے ہوئے، محمد صلی اللہ علیہ وسلم نے اپنی کمر کو کھول دیا اور وہ شخص روتے ہوئے اسے چومنے کے لیے دوڑا۔ جب اس سے پوچھا کہ تم نے ایسا کیوں کیا؟

تو اس نے کہا: "میں چاہتا تھا کہ میری جلد اللہ کے رسول کی جلد کو چھوئے۔”

آپ صلی الله علیہ وسلم اچھے اخلاق کے ساتھ پختہ مومن تھے، ہمیشہ لوگوں کو خوش اخلاقی سے سلام کرتے، اور بزرگوں کا احترام کرتے۔

ایک دفعہ فرمایا:

’’تم میں سے مجھے سب سے زیادہ عزیز وہ ہیں جن کے اخلاق اچھے ہوں۔‘‘

(البخاری)

ان کے تمام محفوظ شدہ قول و فعل سے ان کا پتہ چلتا ہے کہ وہ ایک نہایت نرم مزاج، مہربان، عاجز، عمدہ مزاح اور بہترین عقل والے آدمی ہیں۔ وہ بغیر کسی غرور کے سب سے زیادہ شائستہ تھے اور ان کی زبان بغیر کسی طول کے سب سے زیادہ فصیح تھی۔ سب سے بڑھ کر، وہ ایک ایسے شخص تھے جنہوں نے ہر اس بات پر عمل کرکے دکھایا، جس کی وہ تبلیغ کرتے تھے۔ ان کی زندگی، نجی اور عوامی دونوں، اپنے پیروکاروں کے لیے ایک بہترین نمونہ تھی۔

انگلش سے اردو

الآخرۃ (موت کے بعد کی زندگی) پر ایمان اسلامی عقیدے کے لیے اتنا اہم ہے کہ اس کے بارے میں کوئی شک اللہ (خدا) کے انکار کے مترادف ہے۔

قرآن کریم۔ میں اللہ سبحانہ و تعالی کا اپنا کلام اس ایمان کی بنیاد ہے۔ اس کے علاوہ، رسول اللہ صلی اللہ علیہ وسلم نے اس عقیدے کی اہمیت کو ہر اس شخص کے لیے بیان کیا ہے جو اسلامی زندگی گزارنا چاہتا ہے۔ ہم جانتے ہیں کہ ہمارے پاس مرنے کے بعد کی زندگی کو ادراک کے تجربے کے طور پر جاننے کا کوئی ذریعہ نہیں ہے۔ لیکن اللہ تعالیٰ نے ہمیں شعور کی کچھ ایسی سطحیں عطا کی ہیں جو ہمیں ایسے حقائق کی بصیرت فراہم کرتی ہیں جو حواس کے ذریعے محسوس نہیں ہوتیں۔

اس سلسلے میں قرآن کریم ہمیں مطمئن کرنے کے لیے عقلی دلائل دیتا ہے۔

جب وہ ان کافروں کا جواب بتاتا ہے جو یہ پوچھتے ہیں کہ

"مردہ ہڈیوں کو کون زندہ کرے گا؟”

جواب یقیناً وہی ہے جس نے انہیں پیدا کیا۔

قرآن پاک میں اللہ تعالیٰ انسان سے دلیل کے ساتھ مخاطب ہوتا ہے اور اس کے غور و فکر اور فیصلے کی طاقت کو متوجہ کرتے ہوئے اسے اس بات پر غور کرنے کو کہتا ہے

کہ بارش مردہ زمین کو کیسے زندہ کرتی ہے۔

یہ وہ چیز ہے جو ہم پر عیاں ہے۔

اگر ایسا ہے تو پھر ہم قیامت کی حقیقت سے کیسے انکار کر سکتے ہیں جب کہ اللہ تعالیٰ مردہ ہڈیوں کو اتنی آسانی سے زندہ کر سکتا ہے جس طرح وہ زمین کو زندہ کر دیتا ہے۔

(وہ اللہ ہی ہے جو ہواؤں کو بھیجتا ہے، پھر وہ بادلوں کو اٹھاتی ہیں، اور ہم انہیں مردہ زمین کی طرف لے جاتے ہیں، اور ہم اس سے زمین کو اس کے مرنے کے بعد زندہ کرتے ہیں، اسی طرح قیامت ہو گی۔) :9)

قرآن ہمیں بار بار بتاتا ہے کہ جو لوگ ایمان لاتے ہیں اور نیک عمل کرتے ہیں ان کو آخرت میں بہت زیادہ اجر ملے گا، جب کہ کافر اور برے کام کرنے والوں کو سخت سزا دی جائے گی۔

موت کے بعد کی زندگی پر یقین ہماری زندگی کو معنی دیتا ہے، کیونکہ اسی سے علم ہوتا ہے کہ یہ زندگی صرف ایک امتحان اور ابدی زندگی کی تیاری ہے۔

مزید برآں، ہم جانتے ہیں کہ آخرت میں ہمیں ان تمام مظالم پر انصاف ملے گا جن کا ہم یہاں شکار ہیں۔

ایسا لگتا ہے کہ گنہگار اور بدعنوان لوگ، نیک لوگوں سے زیادہ خوش یا دولت مند ہوتے ہیں، لیکن یہ صرف تھوڑے وقت کے لیے ہے۔ آخرت میں ان کو ان کا حق ملے گا۔

موت کے بعد کی زندگی پر یقین انسان کو دنیا میں اچھی زندگی گزارنے کی ترغیب دیتا ہے، کیونکہ وہ جانتا ہے کہ اگر وہ قرآن میں دیے گئے اللہ کے احکامات اور تنبیہات کو نظر انداز کرتا ہے تو اس کا نتیجہ کیا ہے۔

درحقیقت، بعد کی زندگی پر یقین انسان کے لیے یہاں نیکی کی زندگی گزارنے کی سب سے مضبوط ترغیب ہے۔ ایک پُرامن معاشرے کی حقیقی راہ اسی صورت میں ہموار ہو سکتی ہے جب لوگ مرنے کے بعد کی زندگی پر یقین رکھتے ہوں۔

عربی زبان کے تقریبا تمام الفاظ میں کچھ حروف اصلی ہوتے ہیں باقی سب زائد ہوتے ہیں ، جیسے کتاب ، کاتب ، مکتوب ، مکتب ، مکتبہ اور کتبہ میں ک ت ب حروفِ اصلیہ ہیں اور باقی حروف زائد ہیں۔

حروفِ اصلیہ کو پہچاننے کے تین طریقے

پہلا طریقہ

لفظ کا تین حرفی ایسا لفظ بنائیں جو مشہور ہو اور اس میں معنویت بھی یہی والی موجود ہو جیسے تعلیم سے تین حرفی لفظ علم ہے اور معاملہ سے عمل تو بس یہی تین حروف ان کے حروفِ اصلیہ ہیں۔

دوسرا طریقہ

حروفِ زوائد دس ہیں جن کا مجموعہ ہے: "سألتمونیھا” ، تو جو حرف ان میں سے نہ ہو وہ لازما اصلی حرف ہوگا جیسے منفرد لفظ کے اندر ف ر د ایسے ہیں جو سألتمونیھا میں سے نہیں ہیں لہذا یہ تینوں منفرد کے حروفِ اصلیہ ہیں۔
اگرچہ یہ طریقہ ہر لفظ میں کام نہیں آتا مگر اکثر کام آجاتا ہے۔

تیسرا طریقہ

ثلاثی مجرد سے ماضی مطلق کا سب سے پہلا صیغہ بنائیں ، اس میں جتنے اور جو حروف ہوں گے وہ سب اصلی ہوں گے ، جیسے کتاب کے حروفِ اصلیہ ک ت ب ہیں کہ اس کا ماضی کا پہلا صیغہ کَتَبَ ہے، اسی طرح يُقِيْمُوْنَ کا ماضی کا پہلا صیغہ قَامَ ہے جوکہ اصل میں قَوَمَ تھا لہٰذا اس کے حروفِ اصلیہ ق و م ہیں۔ مگر یہ طریقہ علم الصرف سے واقفیت رکھنے والوں کے لیے مفید ہے۔

حروفِ اصلیہ کو مزید اچھی طرح سمجھنے کے لیے کمنٹ میں دیے گئے لنک پر کلک کرکے ویڈیو دیکھ لیں۔

طالبِ دعا:
محمد اسامہ سَرسَری

"نہ” فقط حرف نفی ہے ، کسی مرکب کا حصہ بنے بغیر آتا ہے جیسے نہ کرو ، نہ کیا ، نہ یہ نہ وہ۔ اس کا عروضی وزن 1 ہے۔

"نا” کے متعدد معانی ہیں:

(1) نفی ، فقط مرکب میں جیسے نامناسب ، نااہل ، ناخلف ، ناجائز

(2) اصرار و تاکید جیسے کرو نا ، نا بابا ، یہ دوست ہے نا

(3) مصدریہ جیسے کرنا جانا لینا دینا (4) استفسار کے لیے جیسے تم نے یہ کرلیا نا آخر۔ اس کا عروضی وزن 2 ہے۔

بعض نو آموز شعراء نہ کو 2 باندھنے کے لیے نا لکھ دیتے ہیں جیسے:
"نا تم نے کچھ کہا ہے نہ میں کہا ہے کچھ”
اس مصرع کے اندر "نا” میں دو غلطیاں ہیں:
(1) املائی کہ اسے "نہ” لکھنا تھا۔
(2) عروضی کہ اسے 1 باندھنا تھا۔

"نہ” اور "نا” میں فرق

یہ دونوں لفظ حرفِ نفی کہلاتے ہیں ، ان میں دو لحاظ سے فرق ہے:

(1) معنوی فرق:
"نہ” صرف نفی کے لیے استعمال ہوتا ہے۔
جبکہ "نا” کے مختلف معانی ہیں جیسے:
۔ ۔ ۔ 1) نفی: جیسے "نہ کر”
۔ ۔ ۔ 2) تاکیدِ نفی: جیسے "نا بابا”
۔ ۔ ۔ 3) تاکید اثبات: جیسے "جانے دیجیے ، بچہ ہے نا”
۔ ۔ ۔ 4) مصدریت جیسے "کھانا ، پینا ، سونا ، جاگنا”
۔ ۔ ۔ 5) حسنِ کلام کے لیے: جیسے "چلونا ، آؤ نا”

(2) استعمالی فرق:
"نا” نافیہ کا استعمال انفرادی طور پر ٹھیک نہیں ہے لہذا "نا کرو” کہنا غلط ہے ، جبکہ "نہ” کو انفرادی طور پر استعمال کیا جاتا ہے ، جیسے "نہ اس نے کھایا نہ میں نے” یہاں "نا” نہیں لکھ سکتے ، "نامعلوم ، نادان ، ناسمجھ ، ناکارہ ، نازیبا” یہاں "نہ” نہیں لاسکتے۔

طالبِ دعا:
محمد اسامہ سَرسَری

”محنت“ چند روزہ نہیں ہوتی کہ آپ ایک ہی مرتبہ سب کر لیں ۔
مطلب یہ کہ : جیسے ہی کامیابی ملی بس کام ختم ۔

محنت جہدِ مسلسل کا نام ہے اور ہم اس کو دِنوں یا ہفتوں پر محیط کر لیں یہ ممکن نہیں ۔ ہر کام محنت پر مبنی ہے جہاں ہم رک گئے ، وہیں سے ہماری ناکامی شروع ہوتی ہے اور ہم سمجھتے ہیں کہ ہم بہت محنتی انسان ہیں ۔ہمیں ناکامی کیوں ہو رہی ہے ؟ مگر ہم یہ نہیں سوچتے کہ پچھلی والی محنت ، آگے کی زندگی کو کامیابی میں بدلنے کے لیے نا کافی ہے ۔ کیونکہ شروع میں کامیابی کے لیے لگاتار محنت کرنی پڑے گی ۔

دراصل کامیاب وہی ہوتا ہے جو ناکام ہوتا رہے اور پھر تندہی سے اپنے مقصد کے حصول کے لیےڈٹ کر مقابلہ کرتا رہے ۔ظاہر ہے جب آپ کچھ نیا کریں گے تو اس میں ناتجربہ کاری کے باعث آپ کو غلطیوں کا سامنا بھی کرنا پڑے گا ۔بار بار کی محنت آپ کے کام کو معیاری اسی لیے بناتی ہے کیونکہ آپ نے ہر بار ناکام ہو کر اپنی محنت کرنے کے انداز کو درست کر کے بدلا ہو گا ،اور مختلف زاویوں سے کام کیا ہو گا ۔۔اورایک دن یہی محنت آپ کو کامیابی کی طرف گامزن کر دیتی ہے ۔کیونکہ آپ غلطیوں کا تدارک کرنا سیکھ جاتے ہیں ۔اب آپ کے پاس اس کام کو کرنے کے لیے ایک مضبوط اور پر اعتماد لائحہ عمل موجود ہوتا ہے ۔ اسی لیے اپنا جذبہ یقین نہیں کھونا چاہیے ۔اور محنت کرتے رہنا چاہیے ،پھر ایک دن آئے گا کہ آپ کو اتنی محنت کی ضرورت نہیں ہوگی ۔

(1) مضمون میں موضوع کی قید ہوتی ہے ، انشائیہ اس قید سے آزاد ہوتا ہے۔

(2) مضمون میں عالمانہ اور محققانہ انداز اختیار کیا جاتا ہے جبکہ انشائیہ میں مؤثر انداز بیان اختیار کرکے بات کی جاتی ہے۔ بالفاظ دیگر مضمون میں معلومات فراہم کی جاتی ہیں اور انشائیے میں تاثرات کو مد نظر رکھا جاتا ہے۔

(3) مضمون کی ہیئت مخصوص ہے یعنی پہلے تعارفی بات ، پھر نفس مضمون ، پھر اختتامیہ ، جبکہ انشائیہ میں اس ہیئت کا التزام نہیں ہوتا ، بلکہ ایک غیر رسمی سا اسلوب اختیار کیا جاتا ہے۔

(4) مضمون کسی قدر خشک ہوتا ہے اور قاری کی ذاتی دل چسپی ہی اسے مضمون کی جانب متوجہ کرتی ہے ، جبکہ انشائیہ اپنے دل چسپ انداز بیان کے ذریعے قاری کی توجہ اول تا آخر حاصل کرنے کی کوشش کرتا ہے۔

(5) مضمون میں مزاح کی بھی بھرپور گنجائش ہے ، جبکہ انشائیہ میں طنز اور مزاح کا عنصر کم سے کم رکھا جاتا ہے۔

(6) انشائیہ کے بارے میں اگر مضمون لکھا جائے تو معلومات کو یکجا کرنے کے لیے کئی کتب اور حوالہ جات کا سہارا لینا ناگزیر ہوگا ، جبکہ مضمون کے بارے میں اگر انشائیہ لکھنا ہو تو کسی کتاب کو کھولنے کی ضرورت نہیں ، بلکہ لکھنے والا مضمون کے بارے میں اپنے اب تک کے تاثرات کو انشائیہ کی صورت میں اپنے قارئین کے سامنے پیش کرسکتا ہے۔

خاکہ کسے کہتے ہیں ؟ خاکہ نگاری اور کسی کہانی کے خاکے میں کیا فرق ہے ؟

خاکہ کہتے ہیں ، کسی چیز کے ڈھانچے کو، اس کے خال و خد کو ، اس کی بنیادی حالت اور ہیئت کو ۔
کسی کہانی میں ”خاکہ“ اس کے بنیادی خیال ہوتے ہیں جس پر کہانی تشکیل پاتی ہے یعنی جیسے عمارت کے لیے ستون درکار ہوتے ہیں ویسے ہی خاکہ بھی ہے ۔ آپ اپنے دماغ میں کہانی سے متعلق کچھ چیدہ چیدہ خیال بن کر ان میں کردار ، تعلقات ، عوامل سب کو کس طرح کہانی میں شامل کر کے کہانی میں سموتے ہیں یہ ”خاکہ“ کہلاتا ہے ۔

خاکہ نگاری : یہ کسی بھی ایسی شخصیت جو معروف بھی ہو ، جس کو آپ بہت اچھی طرح جانتے بھی ہوں اور اس کی زندگی سے متعلق آپ کو بہت معلومات بھی ہوں ۔۔آپ کے تعلق کی نوعیت بے تکلفی پر بھی مبنی ہو ۔تو آپ اس کے زندگی کے مختلف پہلوٶں پر لکھتے ہیں اور جس میں اس انسان کی شخصیت کھل کر سب کے سامنے آ جاتی ہے ۔ یہ ”خاکہ نگاری “ کہلاتی ہے ۔

”خاکہ نگاری “ سنجیدگی پر مبنی بھی ہو سکتی ہے اور ہلکے پھلکے انداز میں بھی کی جا سکتی ہے ، یہ لکھنے والے کی مرضی پر منحصر ہے ۔

دعا کی خواست گار : نازیہ نزی