نعتِ رسولِ مقبول صلی الله علیہ وآلہ وسلم

جو کچھ ہم کام کرتے ہیں ، انھی کے نام کرتے ہیں
یہی خدام کرتے ہیں ، درودِ پاک پڑھتے ہیں

سنواریں قسمتیں سب کی ، اتاریں رحمتیں رب کی
چلو اک کام کرتے ہیں ، درودِ پاک پڑھتے ہیں

علی المشہود صلی اللہ ، علی المحمود صلی اللہ
ورودِ تام کرتے ہیں ، درودِ پاک پڑھتے ہیں

فرشتوں اور خدا کے ساتھ اگر پڑھنی ہو ہم کو نعت
تو اک اقدام کرتے ہیں ، درودِ پاک پڑھتے ہیں

سحر دم ذکرِ آقا سے بجھا کر پیاس ہم پیاسے
یوں اپنی شام کرتے ہیں ، درودِ پاک پڑھتے ہیں

تصور ہاتھ پھیلائے مکانِ دل میں جب آئے
تو ہم اکرام کرتے ہیں ، درودِ پاک پڑھتے ہیں

نبی کا فیض آتا ہے ، دلوں میں نور چھاتا ہے
خدا الہام کرتے ہیں ، درودِ پاک پڑھتے ہیں

سبھی دشمن سبھی پیارے ، تھکن سے چور ہیں سارے
بس اب آرام کرتے ہیں ، درودِ پاک پڑھتے ہیں

خدا کی یاد عزت ہے ، نبی کی نعت قسمت ہے
اسامہ! نام کرتے ہیں ، درودِ پاک پڑھتے ہیں

محمد اسامہ سَرسَری