حضور صلی اللہ علیہ وآلہ وسلم کے حسن و جمال کا تذکرہ۔

۔۔۔۔۔۔۔۔۔۔۔۔۔۔۔۔۔۔۔۔چہرہِ انور:۔۔۔۔۔۔۔۔۔۔۔۔۔۔
جابر بن سمرۃ رضی اللہ تعالٰی عنہ بیان کرتے ہیں: میں ایک مرتبہ نبی اکرم صلی اللہ علیہ وآلہ وسلم کو سرخ جوڑا پہنے چاندنی رات میں دیکھا، میں کبھی چاند کو دیکھتا کبھی آپؐ کے چہرہ انور پر نظر ڈالتا، بالاخر اس فیصلے پر پہنچا کہ نبی اکرم صلی اللہ علیہ وسلم چاند سے کہیں زیادہ حسین ہیں۔
(دارمی ص ٣٠ ج ١) مستدرک حاکم ص ١٨٦ ج ٤
حضرت کعب بن مالک رضی اللہ تعالٰی عنہ کا بیان ہے کہ جب میری جنگِ تبوک میں پیچھے رہ جانے کی وجہ سے توبہ قبول ہوئی تو میں نبی اکرم صلی اللہ علیہ وآلہ وسلم کے پاس حاضر ہوا اور سلام کیا۔ میں نے دیکھا کہ آپؐ کا چہرہ مبارک مارے خوشی کے چمک رہا ہے اور آپؐ جب خوش ہوتے تو آپؐ کا چہرہ ایسے دمک اٹھتا گویا چاند کا ایک ٹکڑا ہے۔
(صیح البخاری ص ٥٦٥ جلد ٦٦)
دلنشین آنکھیں:
۔۔۔۔۔۔۔۔۔۔۔۔۔۔۔۔۔۔۔۔۔
حضرت جابر بن سمرۃ رضی اللہ تعالٰی عنہ کا بیان ہے کہ رسول اللہ صلی اللہ علیہ وسلم کی آنکھیں سرمگیں تھیں تم دیکھتے تو کہتے کہ آپؐ نے آنکھوں میں سرمہ لگا رکھا ہے حالانکہ سرمہ نہ لگا ہوتا۔
(مسند امام آحمد ص ١٩٧ ج ٥)
حضرت امِ معبد رضی اللہ تعالٰی عنہا رسول اللہ صلی اللہ علیہ وسلم کا حلیہ مبارک بیان کرتے ہوئے کہتی ہیں کہ آپؐ کی آنکھیں انتہائی سیاہ اور کشادہ تھیں۔
(مستدرک حاکم ص ١٠ ج ٣٣)
خوبصورت اَبرُو
۔۔۔۔۔۔۔۔۔۔۔۔۔۔۔۔۔۔۔۔۔۔
حضرت علی رضی اللہ تعالٰی عنہ اور حضرت ابو ہریرہ رضی اللہ تعالٰی عنہ کا بیان ہے کہ رسول اللہ صلی اللہ علیہ وسلم کی بھنویں اور پلکیں لمبی لمبی تھیں۔
(مسند امام احمد ص ٣٢٨ ج ٢٢)
چمکدار دندانِ مبارک
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حضرت ابو ہریرہ رضی اللہ تعالٰی عنہ فرماتے ہیں کہ رسول اللہ صلی اللہ علیہ وسلم جب ہنستے تو دندانِ مبارک سے روشنی سی نمودار ہوتی ایسا لگتا دیواریں جگمگا اٹھیں گی۔
(دلائل النبوۃ ص ٢١٥ ج ١)
حضرت ہند بن ابی ہالہ رضی اللہ تعالٰی عنہ فرماتے ہیں کہ رسول اللہ صلی اللہ علیہ وسلم ( کی بیشتر ہنسی تبسم کی صورت میں تھی) مسکراتے تو دانت اولوں کی طرح چمکتے۔
(شمائل ترمزی)
خوبصورت سُتواں ناک
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حضرت ہند بن ابی ہالہ رضی اللہ تعالٰی عنہ کا بیان کہ رسول اللہ صلی اللہ علیہ وسلم کی ناک مبارک بلندی مائل سامنے سے قدرے جھکی ہوئی تھی اس پر نورانی چمک جس کی وجہ سے سر سری نظر میں بڑی اونچی معلوم ہوتی۔
(شمائل ترمزی مترجم ص ٦٠)
روشن جبیں
۔۔۔۔۔۔۔۔۔۔۔۔۔۔
حضرت ابو ہریرہ رضی اللہ تعالٰی عنہ سے کسی شخص نے رسول اللہ صلی اللہ علیہ وسلم کے حلیہ کے متعلق دریافت کیا تو آپؐ نے فرمایا کہ رسول اللہ صلی اللہ علیہ وسلم بے حد روشن جبین تھے۔ جب رات کی تاریکی یا پو پھٹنے کے وقت آتے( یا لوگوں کے مجمع میں رونما ہوتے) تو سیاہ بالوں کے درمیان بالخصوص آپؐ کی تابناک اور کشادہ پیشانی روشن چراغ کی طرح جگمگا اٹھتی تھی۔
(دلائل النبوۃ ص ٣١٧ ج ١)
گردنِ مبارک
۔۔۔۔۔۔۔۔۔۔۔۔۔۔۔
حضرت عائشہ رضی اللہ تعالٰی عنہ فرماتی ہیں کہ رسول اللہ صلی اللہ علیہ وسلم کی گردن بہت ہی خوبصورت، حسین اور معتدل تھی، نہ زیادہ لمبی اور نہ چھوٹی تھی، اس کا وہ حصہ جو دھوپ اور ہوا میں کھلا رہتا تھا وہ اس قدر چمکدار تھا گویا چاندی کی صراحی جس میں سونے کی آمیزش ہو۔
(دلائل النبوۃ ص ٣١٧ ج ١)
فراخ سینہ
۔۔۔۔۔۔۔۔۔۔۔۔۔۔
حضرت عائشہ رضی اللہ تعالٰی عنہ فرماتی ہیں کہ رسول اللہ صلی اللہ علیہ وسلم کا سینہ مبارک کشادہ، مضبوط اور شفاف تھا، صاف اور ہموار، شیشہ کی طرح سفید اور جلد چودھویں رات کے چاند کی مانند۔
(دلائل النبوۃ ص ٣١٧ ج ١١)